Мемлекет басшысы Қасым-Жомарт Тоқаевтың бастамасымен еліміздің аумағында өтіп жатқан «Таза Қазақстан» республикалық экологиялық акциясында тазалық жұмыстарымен қатар өзге де игілікті шаралар атқарылуда. Соның бірі ретінде – бүгін Алматы облысының орталығы Қонаев қаласындағы Қапшағай суқоймасы жағалауында салтанатты түрде ашылған «Еріктілер аллеясын» айтуға болады. Игі істің нышаны ретінде жағалау бойына 200-ге жуық ағаш: қарағаш, қайың, терек, күлте ағаштары отырғызылды, – деп хабарлайды Naqty.kz желілік басылымы.
– «Жастар ресурстық орталығының бастамасымен Қазақстан халқы Ассамблеясы, туризм басқармасы, экология департаменті, сондай-ақ «Жасыл қала Қонаев» және қалалық әкімдік өкілдерінің қолдауымен «Таза Қазақстан» республикалық экологиялық акциясының «Жасыл аймақ» кезеңінде қала мен жақын аудандардан келген 200-ден астам еріктілер Қонаев қаласының қалалық жағажайына 180 түп ағаш отырғызды», – деп атап өтті облыстық жастар ресурстық орталығының директоры Мақсат Кеңесов.
Еріктілер бүгінде облыстың әлеуметтік өмірінде үлкен рөл атқарады. Олар көптеген жобаларға қатысады, аз қамтылған және көп балалы отбасыларға гуманитарлық көмек жинауға көмектеседі, қарттар үйлері мен балалар үйлеріне барып, тәртіпті қалпына келтіреді, экологиялық акцияларға қатысады. Аталған аллея да әр игі бастаманың басы-қасында жүріп, көмек көрсететін волонтердің еңбектерін елеп, олардың маңызды істеріне алғыстың белгісі болды.
Бұған қоса ұйымдастырушылардың айтуынша, бұл шара «Таза Қазақстан» жобасын жүзеге асыруға да үлес қосып отыр. Олар жыл өткен сайын қатысушылар мен егілген көшеттердің санының арта түсетініне сенім білдірді. Жобаға қатысушы ұйымдар мен еріктілердің аты-жөні жазылған ақпараттық белгілерді орнату, отырғызылған ағаштарды тұрақты күтіп ұстауға себеп болмақ.
– Менің өмірлік ұраным: «Отаным үшін не істей аламын?» Осыдан алты жыл бұрын мен еріктілер қатарына өз еркіммен қосылып, әр жолы еліміздің гүлденуі мен дамуына өз үлесімді қосуға тырыстым. Ал қоршаған ортаны қорғау шаралары ең алдымен қоршаған ортаны қорғауға бағытталған. Менің достарым мен пікірлестерім Елбасының бастамаларын толығымен қолдайды. Күн сайын ізбасарларымыз көбейетініне сенгім келеді, – деп бөлісті акцияға қатысушылардың бірі, «Кең болайық» қоғамдық қорының волонтеры, Еңбекшіқазақ ауданынан келген Нұргелді Алдабергенұлы.
Бүгінгі шара қаланың инфрақұрылымын жақсарту және экологиялық мәдениетті дамытудағы тамаша әрі маңызды бастама екенін атап өткіміз келеді. Жастар мен жергілікті тұрғындардың мұндай іс-шараларға қатысуы қаланың көркін жақсартып қана қоймай, экологиялық сана мен қоршаған ортаға жауапкершілікпен қарауды қалыптастыруға септігін тигізеді. Әдемі еріктілер аллеясы олардың күш-жігері мен қоғамдық игілікке берілгендігінің символы болады.
Осындай жобалар арқасында Қонаев қаласының орталық жағажайында жас ағаштар көбейетін болады.
Естеріңізге сала кетейік, су тасқынының қиын-қыстау кезеңдерінде еліміздің түкпір-түкпіріндегі еріктілер, зардап шеккен өңірлерге баға жетпес көмек көрсетті. Атап айтқанда, Алматы облысының еріктілері «Күшіміз бірлікте» гуманитарлық көмек жинау штабының жұмысын ұйымдастырды, оның аясында 500-ден астам ерікті 250 тоннадан астам көмекті жеткізуге көмектесті.