Алматы облысының Панфилов ауданындағы Өсек өзеніне 4 су электр стансасы салынады. Қытай инвесторларының қолдауымен жүзеге асатын жоба іске қосылғаннан кейін 30 адамды тұрақты жұмыспен қамтымақ деп хабарлайды Karasayinfo.kz желілік басылымы өңірлік коммуникациялар қызметіне сілтеме жасап.
– Ауданымызда әрқайсысының қуаттылығы 6 мВт құрайтын, жалпы 24 мВтты 4 ГЭС каскадтың құрылысын салу жоспарлануда. Жоба құны 10,2 млрд. теңгеге шығып отыр. Сонымен қатар, Чехия мемлекетінің инвесторлары су бұру каналдарынан контейнер типті қуаттылығы 1 мВт ГЭС каскады құрылысын салуды жолға қойылуда. Аталған гидроэлектростанциялар толықтай іске қосылса «Қорғас-Шығыс қақпасы» арнайы экономикалық аймағына қосымша электр желілері тартылмақ. Келешекте электр қуатын молайтып, Қытай еліне электр энергиясын экспортталады, – дейді аудан әкімінің баспсөз хатшысы Нұрбол Қанағат. Сондай-ақ, Панфилов ауданындағы негізгі капиталға тартылған инвестиция көлемі өткен жылы 62,0 млрд теңгені құрап, өткен мерзіммен салыстырғанда 5,2 млрд теңгеге көбейген.