Қазақстан Коммунистік Халық партиясы Орталық Комитетінің саяси бюросының мүшесі, Парламент Мәжілісінің депутаты Жамбыл Ахметбеков Қазақстан Республикасы Президентінің сайлауына үміткер ретінде қатысады. Оның кандидатурасы бүгін болған ҚКХП съезінде бекітілді, деп хабарлайды Karasayinfo.kz желілік басылымы Tengrinews.kz сайтына сілтеме жасап.
«Бұл біз үшін өте маңызды тарихи сәт. Жақында өткен съезде арнайы сайлауға қатысуға үміткерді ұсыну туралы шешім қабылдадық. Мәселені барлық деңгейде мұқият талқылау нәтижесінде біз Жамбыл Ахметбековты 2019 жылғы 9 маусымдағы сайлауға үміткер ретінде ұсынамыз», – деп мәлімдеді ҚКХП Орталық Комитетінің хатшысы Лайт Дмитрий. Бұл шешімге партия мүшелері бірауыздан дауыс берді.
Жамбыл Аужанұлы 1961 жылы Ақмола облысы Жантек ауылында дүниеге келді. Целиноград ауылшаруашылық институтын бітірген. Еңбек жолын 1983 жылы Қорғалжын мемлекеттік фермасында механик болып бастады. 1992-1994 жылдары Қарағанды облысы Теңіз аудандық әкімшілігінің мәдениет басқармасының бастығы. Үш жылдан соң Қорғалжын аудандық әкімшілігінің жастар, туризм және спорт бөлімінің меңгерушісі, мәдениет басқармасының бастығы. 2000 жылдың басында Дружба орта мектебінде әскери-патриоттық тәрбие жөніндегі директордың орынбасары болды. 2002-2003 жылдары аудандық білім беру бөлімінде базалық әскери дайындық және спорт бөлімінің әдіскері болды. Кейінірек бірнеше жыл бойы Қорғалжын ауданы әкімі аппаратының бас маманы, ұйымдастыру және бақылау бөлімінің бастығы болды. 2005-2011 жылдары Қазақстан Коммунистік халық партиясы Орталық комитетінің хатшысы, штаб бастығы болып жұмыс істеді. 2012 жылғы 20 қаңтардан бастап — ҚР Парламент Мәжілістің депутаты.