Нұр-Сұлтан қаласы Білім басқармасының басшысы Әнуар Жанғозин балаларды 1-ші сыныпқа қабылдауға байланысты жиі қойылатын сұрақтарға жауап берді,деп хабарлайды Karasayinfo.kz желілік басылымы Zakon.kz сайтына сілтеме жасап.
Соңғы күндері балаларды 1-сыныпқа қабылдау бойынша сұрақтар келіп түсуде. Біріншіден, құжаттарды тек баланың ата-анасы немесе заңды тұлғалары тапсырады. Сондықтан, мектептер өтінішті басқа өкілдерден (ата-әжесі, апасы, ағасы және т.б.) қабылдаудан бас тартуға құқылы.
Екіншіден, қазіргі таңда 1-сыныпқа құжат қабылдау барлық жалпы білім беретін мектептерде стандартына сәйкес жүзеге асырылуда. Қабылдау комиссиясы жұмыс күндері таңғы сағат 9.00-ден 18.30-ға дейін жұмыс жасайды, 13.00-ден 14.30-ға дейін түскі ас. 10 маусымнан бастап құжаттарды электронды жүйе арқылы тапсыру мүмкіндігі пайда болады.
Үшіншіден, шағын аудандар бойынша тіркеу жасалынбайды. Құжат тапсыру үшін мекенжай анықтамасы қажет емес. Сонымен қатар, электронды жүйе сіздің мекенжайға ең жақын мектепті автоматты түрде анықтайтын болады. Ата-ананың қалауынша құжатты сол мектепке немесе басқа мектепке тапсыру мүмкіндігі беріледі. Қабылдаудың үлгі қағидаларына сәйкес, ең бірінші кезекте білім беру ұйымдарына қызмет көрсету аумағында тұратын барлық балалардың қолжетімділігі қамтамасыз етіледі. Содан кейін, бос орын болған жағдайда, ата-аналардың қалауы бойынша өтініштер қабылданатынын назарларыңызға салады. Бұл шара кейбір астаналық мектептердің тығыздылығы бойынша жағдайын қадағалау мақсатында жасалынған.
Төртіншіден, мемлекеттік қызметті көрсету үшін қажетті құжаттардың мынандай тізбесі қажет:
1) ата-ананың немесе заңды өкілдерінің тарапынан жазылған өтініш;
2) баланың туу туралы куәлігінің көшірмесі;
3) денсаулық жағдайы туралы анықтама №063/у;
4) денсаулық жағдайы туралы анықтама 026/у-3;
5) баланың 2 данада 3х4 сантиметр өлшеміндегі фотосурет;
Ерекше білім берілуіне қажеттілігі бар балаларды білім беру ұйымдарына оқуға қабылдау үшін заңды өкілдерінің келісімі болған жағдайда педагогикалық-медициналық-психологиялық комиссияның қорытындысы қосымша беріледі.