Қараша айының бірінен бастап елімізде мекенжай сертификаты жойылып, мемлекеттік органдар, мектептер, медициналық орталықтар және басқа да мекемелер адамдар туралы мәліметтерді интеграцияланған деректер базасы арқылы алады, деп хабарлайды Karasayinfo.kz желілік басылымы Tengrinews.kz сайтына сілтеме жасап.
Қазақстанда бірінші қарашадан бастап мекенжай анықтамасы талап етілмейді және мемлекеттік көрсетілетін қызметтер тізілімінен алынып тасталатын болады. Яғни, еш мемлекеттік орган, мектеп не медициналық мекеме азаматтардан мекенжай анықтамасын бірінші қарашадан бастап сұрата алмайды. Сондай-ақ, оны «Азаматтарға арналған үкіметтің» филиалдарынан да, электронды үкімет порталынан да алу мүмкіндігі болмайды.
Қажет болған жағдайда азамат тіркеуге тұрған мекенжайын egov.kz электронды үкімет порталы мен eGov mobile қосымшасындағы жеке кабинет арқылы тексере алады. Ал, мемлекеттік органдарға келетін болсақ, олар бұл мәліметті ішкі істер министрлігінің деректер базасымен интеграцияланған ақпараттық жүйелері арқылы алады. Бірақ, бұл заң барлық қазақстандықтарға әсер етпейді. Мәселен, Ресеймен шекаралас ауылдардың тұрғындары үшін тұрғылықты жері туралы ақпарат беру қажеттілігі қалады. Мұндай норма екі ел арасындағы халықаралық шартта қарастырылған. Мекенжай анықтамасын Ресеймен шекаралас ауылдық округтердің әкімдері береді. Егерде адамда ғаламтор желісі болса, аталған ауылдардың тұрғындары мекенжай бойынша анықтаманы egov.kz порталы арқылы ала алатын болады.
Тағы да бір айта кетері, алдағы уақытта мекен-жай сертификатынан басқа, психо, есірткі және туберкулезге қарсы диспансерлерден, жылжымайтын мүліктің болмауы немесе болмауы туралы, жұмыссыз ретінде тіркелу туралы сияқты тағы 28 куәліктен бас тарту жоспарланған.