Мектеп оқушылары ұлттық қазақ спортымен айналысатын болады. Мұндай заңды кеше Сенат депутаттары мақұлдады, деп хабарлайды Karasayinfo.kz желілік басылымы Holanews.kz сайтына сілтеме жасап.
Қазіргі уақытта Мәдениет министрлігі пилоттық жоба ретінде Нұр-Сұлтандағы орта мектептерге жаңа бағдарламаны енгізді.
Заң жобасында бұқаралық спортты дамыту бойынша бірқатар шаралар қарастырылған. Бұл дене шынықтыру мен білім беру арасындағы тығыз байланысты қажет етеді.
«Бұқаралық спортты дамытуда ұлттық спорт түрлерінің рөлі зор. Бұны біз бұқараның жұмысы деп атаймыз. Ауыл балаларына ұлттық спорт түрлерін білу аса қажет болмауы мүмкін, бірақ біз қаладағы оқушыларды да ұмытпауымыз керек. Және ұлттық спорт дегеннің не екенін түсіндіруіміз қажет. Қазақ халқының дәстүрі бойынша бала барлық дәстүрді әкесінің қанымен және ананың сүтімен сіңіреді. Ұлттық спорт салауатты ұлт құрудың негізіне айналуы керек деп толық сеніммен айту керек. Дене шынықтыру режимінде қазақтың халықтық ойындары мен ұлттық спорт түрлерін ұтымды пайдалану бұқаралық спортты дамытуға мүмкіндіктер ашады»,- деді Мәдениет және спорт министрі Ақтоты Райымқұлова.
Осыған байланысты бүгін: «Ұлттық спорттың неше түрі бар?», «Олар білім беру бағдарламасына енгізілген бе?», «Бұл жаңашылдық қалай жүзеге асырылуда?»,- деген сауалды Парламент Сенатының жалпы отырысында депутат Қуаныш Сұлтанов қойды.
20-дан астам ұлттық спорт түрлері ХХІ ғасырға жетті. Олардың ішіндегі ең жарақатсыздары ғана міндетті мектеп бағдарламасына енеді. Қазіргі уақытта Мәдениет және спорт министрлігі еліміздің барлық мектептерінде осы компоненттерді енгізу үшін нормативтік құқықтық актілерді әзірлеуде.
«Бірінші кезекте білім беру ұйымдарына асық-ату, тоғыз-құмалақ және қазақша-күресті енгізеді. Алдымен оларды мектептерге енгіземіз, содан кейін аударыспақ, келесі кезеңде — көкпар, жамбы ату, жекпе жек. Олар адамға зақым келтірмейді. Пилоттық режимде Нұр-Сұлтандағы орта мектептерде қазақша күрес енгізіліп үлгерді», — деді Ақтоты Райымқұлова.