Бүгін таңертең Алматыда ҚР Ұлттық ғылым академиясының академигі, филология ғылымдарының докторы, профессор Өмiрзақ Айтбаев дүниеден өтті, деп хабарлайды Karasayinfo.kz желілік басылымы Тengrinews.kz сайтына сілтеме жасап.
Халықаралық «Қазақ тілі» қоғамының негізін қалаушылардың бірі, әрі президенті Өмірзақ Айтбайұлының жерлеу рәсімі туған жері Отырар ауданында өтетін болады.
Ахмет Байтұрсынұлы атындағы Тiл бiлiмi институтының бас ғылыми қызметкері болған Айтбайұлы Өмірзақ Айтбаев 1936 жылы 5 сәуірде Оңтүстік Қазақстан облысы қазіргі Отырар ауданы Балтакөл ауылында дүниеге келеген.
С.М.Киров атындағы Қазақ мемлекеттік университетін (әл-Фараби атындағы Қазақ ұлттық университеті) тәмамдаған. Филология ғылымының докторы, профессор, Қазақстан Республикасы Ғылым академиясының корреспондент-мүшесі, Қазақстан Республикасының Әлеуметтік ғылымдар академиясының академигі.
1959-1962 жылдары «Социалистік Қазақстан» газетінің әдеби қызметкері, 1962-1999 жылдары Қазақстан Ғылым академиясы Тіл білімі институтының кіші, аға ғылыми қызметкері, бөлім меңгерушісі, аға, бас ғылыми қызметкері. 1995-1996 жылдары Қазақ мемлекеттік қыздар педагогикалық институтының профессоры, 1997-1998 жылдары Қ.А.Яссауи Халықаралық қазақ-түрік университетінің профессоры болып жұмыс істеген. 1999 жылдан «Қайнар» университетінің қазақ тілі және әдебиет факультетінің, филология факультетінің деканы, Қазақстан Республикасының Білім және ғылым министрлігі Тіл білімі институтының Терминологиялық орталығының директоры қызметтерін атқарған. А.Байтұрсынұлы атындағы Тіл білімі институтының бас ғылыми қызметкері, халықаралық «Қазақ тілі» қоғамының президенті. «Құрмет», «Парасат» ордендерімен марапатталған.