Бүгін, Елбасының кіндік қаны тамған жер Үшқоңыр ауылдық округінде аудан басшысының кезекті есеп беру жиыны өтті. Өте керемет көңіл күйде қарсы алған үшқоңырлықтар, аудан әкімі Махаббат Бигелдиевтің өткен жылы атқарған жұмысына оң бағасын берді. Атап айтқанда, жаяу жүргіншілерге арналған көпірге, күрделі жөндеуден өткен көшелерге тұрғындар өз тарапынан ризашылығын білдірді.
Үшқоңыр мәдениет үйінде жиналған жұртшылық алдында алдымен аталған округке қатысты қолға алынған жұмыстардың сәтті аяқталғаны қорытындыланып, келешек еншісіндегі мақсат-міндеттер сөз етілді. Мұнда, сондай-ақ, көкейіндегі сауалдарын алға тартқан тұрғындар да болып, олар негізінен ауыл көшелері мен қаңғыбас иттерге қатысты бірқатар мәселелерін айтты. Бұдан бөлек, осы округтен Жандосов ауылдық округіне баратын жолға бағдаршам орнатылса, сонымен қатар, балаларды сауықтыру орталығы салынса деген ұсыныстар айтылды.
Барлығын мұқият тыңдаған аудан әкімі Махаббат Бигелдиев округ тұрғындарына толыққанды жауап беріп, бірқатар ой-пікірлердің назарға алынатынын айтты. Ал, кейбір мәселелердің шешілуіне уақыт пен қаржы керектігін және де барлығы өз кезегімен орындалатынын жеткізді.
