Атырауда миллион медициналық масканы жоғары бағамен сатпақ болғандар ұсталды, деп хабарлайды karasayinfo.kz желілік басылымы Қаржы бақылау комитетінің баспасөз қызметіне сілтеме жасап.
Комитет мәліметінше, жедел-іздестіру шаралары барысында заңсыз кәсіпкерлікпен айналысқандар анықталды.
«Қазақстан Республикасында төтенше жағдай енгізілгенде Атырауда бір топ адам миллион дана маска сатумен айналысқан, маскалардың жалпы құны — 313 миллион теңге. Оларда ешқандай құжат болмаған», — делінген хабарламада.
Осы дерек бойынша сотқа дейінгі тергеудің басталғаны айтылады.
Еске салайық, мұның алдында Нұр-Сұлтанда маскаларды жоғары бағамен сатқандардың ұсталғаны хабарланған еді. Олар 55 мың маска сатпақшы болған еді.