Жемқорлық фактілерін әшкерелеген 9 адамға 1,5 млн теңге көлемінде сыйақы берілген, деп хабарлайды Karasayinfo.kz желілік басылымы ҚазАқпарат сайтына сілтеме жасап.
Бұл туралы бүгін ҚР Сыбайлас жемқорлыққа қарсы іс-қимыл агенттігіне қарасты Стратегия және жедел басқару департаментінің басшысы Ринат Қабиев хабарлады.
– Жемқорлық фактілері туралы хабарлаған белсенді азаматтық ұстанымы бар ел тұрғындарын ынталандыру тәжірибесі де бар. Айталық, 2019 жылы Call-орталыққа түскен шағымдар бойынша сотта қаралған қылмыстық істер бойынша 9 азаматқа 126 250 теңгеден 176 750 теңгеге дейін, жалпы 1,5 млн теңгеге жуық сыйақы берілді, – деді ол.
Департамент басшысы сыбайлас жемқорлыққа қарсы қызмет қызметкерлерінің үстінен де шағым түсетіндігін айтады. Дегенмен, мұндай шағымдарды агенттіктің Өзіндік қауіпсіздік қызметі тыңғылықты тексереді. Сонымен қатар, Ринат Қалиевтің айтуынша, Call-орталыққа келіп түсетін шағымдардың басым бөлігі Түркістан облысына тиесілі. Бұл өңірден өткен жылы 148 шағым түскен. Одан кейін Алматы облысы (137) мен Алматы қаласынан да (112) шағым жиі түседі.