Жыл сайын мамыр айының 12 жұлдызында Халықаралық медбикелер күні аталып өтеді. Осы кәсіби мерекеге орай аудандық орталық аурухананың кәсіподақ ұйымы мерекелік шара өткізді. Кешті аудандық орталық аурухана директоры Ербол Сарсенбаев ақ халатты абзал жандардың еңселі еңбектерінің зор екендігін айтып, құттықтауын білдірді. Ары қарай аға медбикелер Анар Жылгелдиевага, Сауле Жайлаубаеваға, Гүлсім Қоспановаға «Мейірім» орденін табыс етті. Сондай-ақ үздік орта медициналық қызметкерлерді мейірімділік, кәсіби шеберлігі Алғыс хаттарымен марапаттады. Келесі сөз кезегі аудандық ауруханасы директорының орынбасары Бақыт Жамекенов алып, саналы ғұмырын халық денсаулығын сақтауға арнаған жандардың аз емес екендігін айтып, еңбектерін ешқашан елеусіз қалдырмай, бағалайтындықтарын айтты. Дипломдарын енді қолдарына алып келген медбикелерді жігерлендіру мақсатында «Жас маман» ленталарын тақса, еңбек жолын медицинаға арнап, осы жылы қызметінен зейнетке шығатын ардагерлеріне құрмет көрсетіліп, сыйлықтар тарту етілді. Жігерлі Жәдел жәрдем бөлімінің жас мамандары «Практика» қойылымы арқылы аурухананың біркүндік өмірін назарға ұсынса, ал Үшқоңыр ауылдық ауруханасының мейірбикелері «Қол жуу тәртібі» атты флешмобын көрсетті. Кеш соңын кәсіподақ төрайымы Сауле Малгараева қорытындылап, кәсіби мерекелеріне орай аудандық ауруханалардың әр бөлімшелерге күнделікті қажетті сыйлықтар табыс етілді.
