Тасмағамбетов мәлімдеме жасады: Қасым-Жомарт Тоқаевқа қолдау көрсетуге шақырамын!

   Тасмағамбетов мәлімдеме жасады: Қасым-Жомарт Тоқаевқа қолдау көрсетуге шақырамын!

Иманғали Тасмағамбетов қазақстандықтарға үндеу жасады, — деп хабарлайды Naqty.kz.

Үндеу Abai.kz сайтында жарияланды.

«Ағайындар, бауырлар, азаматтар!

Осынау қаңтардың қаһарлы күндері елімізде, оның ішінде айналайын ақ Алматымыздың басына түскен қаралы күндері орын алған дүрбелеңде Өздеріңізге үн қатуды азаматтық парызым деп білемін.

Өкінішке орай, осы күндері қаза тапқан азаматтар аз емес. Олардың отбасылары мен жақындарына қайғырып көңіл айтамын. Имандары жолдас болсын.

Сөз жоқ, біздің ел ежелден еңбек пен ерлікті, жігер мен ерікті ту еткен текті халық. «Бас кеспек бар болса да, тіл кеспек жоқ» деп өз тілегін тілімен, сөзімен жеткізген жұрт. Сондықтан да бұл күндері кей өңірлерде басталған шерулер бейбіт сипатта, әділетті талаппен болды.

Десе де, арнайы дайындалған арандатушылар мен содырлар жағдайды пайдаланып кетті. Нәтижесінде, «Тәуелсіздіктің тал бесігі» саналатын алып шаһарды қантөгістің алаңына айналдырды. Бұл жәй ғана қылмыс емес. Бұл жауыздық! Отанға, Тәуелсіздікке жасалған опасыздық! Қарапайым азаматтарымызға жасалған қатігездік!

Мұндайда ел болашағы үшін жауапкершіліктің ауыр жүгі Мемлекет басшысының мойнында. Ал дәл қазір Президент әр азаматтың, әр отбасының, тұтас қоғам қауіпсіздігінің жалғыз кепілі!

Осы орайда, мен барша қазақстандықтарды Мемлекет басшысы Қасым-Жомарт Тоқаевқа қолдау көрсетуге шақырамын!

Біз қай жерде туып, қай өңірде жүрсек те бір атаның баласымыз. Қарға тамыр қазақпыз!

Мен күшті де қуатты, әсем де әлеуетті мемлекеттің ертеңіне сенемін!

Аман болайық! Ел бірлігі мен берекесін сақтайық, ағайын!», — деді Тасмағамбетов үндеуінде.

Еске салайық, Иманғали Тасмағамбетов қазір зейнетте. Ол еңбек жолында Қазақстан премьер-министрі, Қазақстан бас хатшысы, қорғаныс министрі, Қазақстанның Ресейдегі елшісі болған. Сондай-ақ, Атырау облысы, Алматы мен Нұр-Сұлтанды басқарған.

 

 

 

Оставить комментарий

Ваш адрес email не будет опубликован. Обязательные поля помечены *

Что будем искать? Например,Человек

Мы в социальных сетях