Кеше «Азаматтарға арналған үкімет» мемлекеттік корпорациясының Алматы облысы бойынша филиалының Талдықорған қаласындағы МХКҚ орталығында бірқатар танымал тұлғалар автожүргізушілерге қызмет көрсетті. Мемлекеттік маман ретінде шақырылған әнші, Қазақстан Республикасының еңбек сіңірген әртістері – Қанат және Айтгүл Құдайбергеновтер және айтыскер ақын – Айтақын Бұлғақов тұрғындарға жан-жақты кеңес беріп, өздерінің бағыттарынан бөлек, қоғамдық ортада қалай жұмыс жасай алытындарын іспен дәлелдеді. Бұдан бөлек, азаматтарға өзіне-өзі қызмет көрсету секторларында онлайн алу жолдарын көрсетіп, цифрлы сауатты болуға шақырды.
Сондай-ақ, осы күнде қиындығы мен қызығын қатар көрген өзге маман иелері алған әсерлерімен бөлісті. «Елімізде цифрландыру бағытында көптеген жұмыстар қолға алынып жатыр. Үйден шықпай-ақ қызметті алуға толық мүмкіндік жасалған. Біз қызметтерді онлайн алудың еш қиындығы жоқ екендігін көрсетудеміз. ХҚО қызметкерлерінің жұмысының оңай емес екенін өзім басымнан өткеріп түсіндім. Халықпен күнделікті қоян-қолтық жұмыс жасау оңай шарауа емес»,- деген Қанат Құдайбергенов таңғалысын жасыра алмады. Ал, айтыскер ақын Айтақын Бұлғақов алған әсерін өлең жолдарымен былай жеткізді:
ЦОН да болса жұмысың,
Жеделдетіп бітірер,
Электронды барлығы
Жайымыз жоқ күттірер.
Қызмет алуға келушілер танымал тұлғалардың қолынан анықтама алып қана қоймай, мүмкіндікті пайдаланып, естелік суретке түсті.
