Белгілі тележурналист Жайна Сламбек «Хабар» арнасының директоры қызметіне тағайындалды. Бұл туралы «Хабар» агенттігі» АҚ басқарма төрағасы Берік Уәли мәлім етті, деп хабарлайды Naqty.kz желілік басылымы Экспресс К сайтына сілтеме жасап.
Бүгіннен бастап Жайна Сламбекқызы «Хабар» арнасының директоры лауазымына тағайындалды. Жайна журналистиканың өз жауынгері. Көрермен қауым оны сараптамалық бағдарламалардың авторы әрі жүргізушісі ретінде жақсы таниды,
— деді Берік Уәли.
Жайна Сламбекқызы 1974 жылы 12 қарашада Қызылорда облысы, Қармақшы ауданы, Қуаңдария ауылында дүниеге келген.
Әл-Фараби атындағы Қазақ ұлттық университетінің журналистика факультетін аяқтаған.
Еңбек жолын университет бітірген 1996 жылы жазда «Хабар» агенттігінде тілші болып бастаған. 2014 жылдың ақпанына дейін комментатор, атқарушы продюсер, тележүргізуші, ақпараттық-сараптамалық бағдарламалар дирекциясының директоры болып жұмыс істеді.
2014 жылдың ақпанынан 2019 жылдың шілдесіне дейін «Астана» телеарнасында «Біздің уақыт» ақпараттық-сараптамалық бағдарламасының авторы әрі жүргізушісі болды.
2019 жылдың тамызынан бері Ұлттық арнадағы «Apta» бағдарламасының жетекшісі және жүргізушісі.