Қаскелең қаласының Қ. Сәтбаев атындағы орта мектебінде 1маусым –халықаралық балаларды қорғау күніне арналған мерекелік іс-шара өтті. Оған Қарасай ауданы прокурорының орынбасары Дархан Досмухамбетов, аға прокурор Ермек Базарбаев қатысты. Қарасай ауданының прокуратура қызметкерлерінің атынан Дархан Балтабекұлы ата-аналар мен балаларды құттықтай отырып, аудан мектептерінің бүлдіршіндеріне өз тарапынан саламатты өмір салтын қалыптастыруды дамытуға үлесін қосып, Қ. Сәтбаев, Қарасай батыр, А.Пушкин, М. Әуезов, Қосынов, Көкөзек, Ы.Алтынсарин атындағы мектептерінен арнайы шақыртылған жетім, жартылай жетім, көпбалалы отбасынан шыққан 10 оқушыға спорттық киімдер, ойын жабдықтарын табыстады.
Мектеп директоры Қорлан Тұрсынова мерекеге атсалысқан азаматтарға ата-аналар мен мектеп әкімшілігі атынан алғысын білдірді.
Жиын Қ. Сәтбаев атындағы орта мектебінің бастауыш сынып оқушыларының концертіне ұласты. Олар балауса шақты бейнелейтін «Мәңгілік елдің бақытты балалары» тақырыбында асфальтқа сурет салу байқауына қатысып, жеңімпаздарға мектеп әкімшілігі тарапынан дайындалған сыйлықтар тапсырылды.
Сондай-ақ, мерекеге Қарасай ауданының білім бөлімінің қамқоршылық және қорғаншылық бөлімінің бас маманы А. Айтжанова қатысып, мектеп жанындағы «Қарлығаш» сауықтыру лагерін ашып берді.