Бірқатар санаттағы азаматтарға 42 500 теңге өтінім бермей-ақ, автоматты түрде тағайындалуы мүмкін, деп хабарлайды karasayinfo.kz желілік басылымы. Бұл туралы ҚР Еңбек және халықты әлеуметтік қорғау министрі Біржан Нұрымбетов брифинг барысында айтты.
– Көпшілік «өткенде алдық, енді жаңадан өтінім бермей-ақ төлей салуға болмай ма?» деп сұрақ қойып жатыр. Өтінім бермесе болмайды деп шештік. Себебі, біріншіден әр өңірде жағдай әртүрлі. Кей мекемелер жұмыс істеп жатыр. Бұрын тоқтап тұрғандары қайтадан жұмысына кірісті. Оның үстіне төтенше жағдай кезінде жұмыс істеп, қазір жұмыссыз қалған адамдар да болуы мүмкін. Әрине, олар да өтінім беріп, төлемді алуы тиіс, – деп Б.Нұрымбетов ашып түсіндірді .
Министрдің айтуынша, бірқатар санаттағы азаматтардан өтініш қабылданбай-ақ, әлеуметтік төлем берілуі мүмкін. Бұл мәселені Еңбек пен Цифрлық даму министрліктері өзара талқылау үстінде.
– Сол белгілі бір санаттағы азаматтардың атына «Өткен жолы әлеуметтік төлем алдыңыз. Жағдайыңыз сол қалыпта ма? Оны растайсыз ба? Сізге өтінішсіз төлем тағайындасақ, қарсы емессіз бе?» деп СМС-хабарлама жібереміз. Қарсы емеспін десеңіздер, жұма күннен бастап әлеуметтік төлем тағайындауға дайынбыз, – деді министр брифинг барысында.