Қазақша
Бүгін Елтай ауылдық округінде екі бірдей балабақша өз есігін айқара ашты. Оның бірі – М. Бейсебаев атындағы орта мектептің директоры Гүлзира Бейсебайқызының себепкерлігімен жұмысын бастаған «Нұр сезім» бөбекжайы. Ал, екіншісі, аталған округке қарасты Береке ауылындағы «Бәйтерек» балабақшасы. Бұл мекеменің басы қасында жүрген Исаев бастауыш мектебінің меңгерушісі Балжан Садыққызы.
Осы қос қуанышты жұртшылықпен қатар бөлісуге округ басшысы Бақыт Сағындыққызы мен аудандық білім бөлімінің әдіскері Ләйлә Мәуленқызы арнайы келіп, жергілікті тұрғындарды құттықтады. Өз сөзінде ауыл әкімі бөбекжайлардың ашылуына үлесі бар тұлғаларға алғысын айтып, Елтай ауылдық округін бірге дамытуға шақырды. Салтантты жиында дәстүрімізден жаңылмай ақсақалды қариялардың, ақжаулықты әжелердің батасымен, шашумен бірге ресми түрде 30 орынды бөбекжайдың қызыл лентасы қиылды. Айта кетейік, аталған мектепке дейінгі мекемелер «Балапан» бағдарламасына қосылуға өтініш білдірген. Алдағы уақытта олар мемлекет қамқорлығына ие болса, ата-аналарға да айтарлықтай жеңілдік байқалмақ.
Енді ғана жұмысын бастаса да, мұндағы балдырғандар қонақтарды былдыр- былдыр тақпақтарымен, әсем әндерімен, келісті билерімен қарсы алды. Оған мәз болған жұртшылық бүлдіршіндердің өнеріне сүйсіне қол соғып, келешек ұрпақтың кемел келешегіне деген мол үмітпен тарқасты.
