Қазақша
Ауданымыздағы «Батыр бала» спорт клубы киокушинкай-кан каратэ шығыс жекпе-жегінен жасөспірімдерді жаттықтырып, болашақтарының жарқын болуына ықпалын тигізуде. Олар бұл жерде жаттығып қана қоймай, көптеген жарыстарға қатысып, жүлделі орындарды алуда. Атап айтсақ, жуырда осы орталықтың шәкірттері Маңғыстау облысының киокушинкай-кан каратэден ашық республикалық турнирінде де осал еместіктерін дәлелдеп, Жетісу өңірінің намысын қорғап, 3 алтын, 1 күміс, 2 қола медальдарды қанжығаларына байлап қайтты.
Аталған дүбірлі додада 10-11 жас аралығында сынға түскен Дулат Алдашев пен Нұрболат Ерболат алтын алса, 12-13 жас ішінде Медет Әжібек жүлделі 1-орынды жеңген. Ал, 2-орынмен Мейірбек Қанатбаев қайтса, қола медальдарды Ерасыл Ахан мен Алмат Қанатбаев иеленген. Еске сала кетсек, аталған спортшылар ауданымызда өткен «Kaskelen Cup – 2017» біріншілігінде осы жарысқа жолдама алғандар болатын. Ал, ендігі кезекте батыр балаларымыздың бағындырар белесі Ақтөбе қаласында өтетін Қазақстан Республикасының кубогы болмақ.
