Жетісу өңірінде жиырма екі музей тіркелген. Бұл мекемелердің мақсаты ұлттық құндылықтарды дәріптеп, асыл қазыналарымызды санамыздан өшірмей, тарихымыздың таңғажайып мұраларын сақтап, насихаттау. Сондай- ақ, өскелең ұрпақты өткенімізге құрметпен қарауға баулу. Осы орайда олардың әрдайым бір-бірімен шығармашылық байланыста болып, тәжірибе алмасуы құптарлық іс. Оның айқын дәлелі ретінде бүгін Қарасай аудандық тарихи- өлкетану музейінде өткен «Алатау ақындары» атты жылжымалы көрмесін айта аламыз. Осының барысында Жамбыл ауданынан келген Жамбыл Жабаев және Үмбетәлі Кәрібаев атындағы әдеби- мемориалды музейлері өз жәдігерлерін көпшілік назарына ұсынды. Абыз ақын атындағы музей өкілдері жүз жасаған жыр алыбының тартқан домбырасын, киген шапанын, бөркін, құранды ерін, кітаптарын, портретін және марапатталған ордендерін алып келген. Бір қызығы бұл мекеменің бас сақтаушысы Жамбыл атамыздың тікелей ұрпағы Салтанат Жамбылова екен. Ал, Әуелбек Ысқақов Үмбетәлі ақынның немересі. Ол бүгінде атасының атындағы әдеби- мемориалды музейіне басшылық етеді. Олар өз тараптарынан айтыскердің киген киімдерін, тұтынған заттарын және күміс ер тоқымын алып келген.
Жылжымалы көрме ұйымдастырушылары тарихқа шолу жасап, жыр алыптарының өміріне тоқталып, келген қонақтарға кеңінен ақпарат берді. Авторлардың өлеңдерін тілге тиек етіп тағылымға толы оқиғалармен бөлісті. Осы ретте Қаныбек Мұсахан есімді жас ақын қазақтың қара домбырасымен арнау арнап, көрерменді тәнті еткенін ерекше атаған жөн.
«Мұражайлар, мұражайлар,
Тарихтан қалған онда мұралар бар,
Өткен күнді еске алам десеңіздер
Мұражайға келіңдер тірі адамдар» – деп Әуелбек Ысқақов жырлағандай музейге барып, сіз де тамашалап қайтыңыз. Аталған жылжымалы көрме ауданымызда бір аптаға жуық уақыт тұрады.
