Алматы облысында су және газ жүйелері реттеледі

0
940

Алматы облысының әкімі Марат Сұлтанғазиев барлық ауылдық округтің су құбырларын тексеріп, түгендеу жұмысын жүргізуді тапсырды, деп хабарлайды naqty.kz  желілік басылымның тілшісі.

Қонаев қаласы мен аудан әкімдерінің басын қосқан алқалы жиында облыс басшысы тұрғындар тарапынан суға қатысты арыз-шағым жиілеп кеткенін алдыға тартты.

«Жалпы, өңірдегі ауылдарда суға қатысты туындап отырған мәселе көп. Кейбір су құбырында қысым жеткіліксіз, кейбірінде магистралдық су жүйесі реттелмеген. Енді бірінде су сүзгісі жолға қойылмаған.

Осы мәселелердің бәрін ауыл әкімдерімен бірлесіп, тексерістен өткізіп, жоба-жоспарын жасап алайық. Облысты газдандыру және басқа да сала бойынша жұмыстарды осылай картаға түсіріп, рет-ретімен істеуіміз керек. Көгілдір отын келді, газ бар деп айтқанымызбен іс жүзінде бәрі басқаша. Ұятты болса да айтайық, газды жеке тұрғын үйлер тұрмақ, ауруханаларға әлі толық тарта алмай отырмыз. Су мәселесі де солай. Су бар дейміз, бірақ іс жүзінде көшеден тасып ішіп, машақатын көріп жүрген ауыл тұрғындары жетерлік», – деді Марат Елеусізұлы.

Облыс әкімі жиында аталған мәселелерді шешу үшін ең алдымен өңірлерді сумен және көгілдір отынмен қамтамасыз ету бойынша тексеру, түгендеу жұмысын жүргізуді міндеттеді.

«Екі апта уақыт беремін. Бүкіл аудан-аудандағы елді мекен, ауылдар бойынша су, газ, тағы да басқа мәселелер бойынша геокарта жасап, мәлімет берілуі керек. Қай ауылда қай құбыр істемейді, қай құбыр толық жұмыс істеп тұр, қай құбырдың құрылысы орта жолда қалып қойған, осының бәрі картада көрсетілгені жөн. Егер біз осылай жүйелеп алмасақ, онда мәселенің шешімін табу қиын. Қазір статистикаға, деректерге бәрінің қолы жетеді. Жасырып қайтеміз, жоқты жоқ, барды бар деп айту керек. Оның үстіне қазір ауыл әкімдерін сайлап жатырмыз. Халық оларға сеніп отыр. Әкімдер бар күшін салып, үлкен ұмтылыспен, ынта-ықыласпен жұмыс істеуі қажет», – деп түйіндеді Алматы облысының әкімі.

ОСТАВЬТЕ ОТВЕТ

Пожалуйста, введите ваш комментарий!
пожалуйста, введите ваше имя здесь